مبارح كان يوم أخدنا فيه قرار مصيري أنا وحبيبي عبدالله، وكان مرهق جسديا ونفسيًا. ع كل حال لأنه أنا ما بحب الأشياء اللي بتيجيني ع الجاهز فكان لازم أعمل أكل للعشاء فعملت هذه اللوحة الفنية اللي طعمها أزكى من شكلها واللي خلتني أنسى كل أحلام نومة العصر وأتذكر إنه ما في يوم كامل بس في يوم بنقرر نلاقي فيه جزء بسيط حلو ونسلم الأمور لرب الأمور.
المكونات
- كوب عدس منقوع ليلة كاملة
- نص كوب لبن يوناني
- ملعقة صودا خبيز
- ملعقة صغيرة ملح
- ملعقة أوريجانو
- نص كوب جبنة أريش
- ٢ بيض
- شبت أخضر
- ٢ ملعقة زيت زيتون
الطريقة
صفي العدس واغسله منيح
ضيف عليه البيض واللبن والملح والبكينغ باودر والأوريغانو والزيت -وضفت كمان زعتر ضفة-.
بتخلط منيح كتير لتصير العجينة سائلة وبعدين ضفت الشبت المفروم (يكون ناشف) والجبنة وحركتهم بالمعلقة
زينتها ببذور كتان وقزحة وسمسم وعرقين ثايم (زعتر).
حطيتها بقالب مستطيل عليه ورق زبده، بفرن حامي ع حرارة ١٨٠ لأربعين دقيقة
تركتها ترتاح ساعة.
أكلناها مع جبنة لور ودبس فليفلة
تخيلوا هاي الكعكة اللذيذة موجودة ومكتوب عليها جلوتن فري شوجر فري … بلالالا وسعر القطعة ١٠ دولار ( في اسطنبول على الأقل)
وبس…